Gott er í sólinni að gleðja sig.

Sól, sól skín á mig. Söng Hanna María ef ég man rétt. Hér var heldur betur molla í morgun. Allir gluggar núna galopnir, en kemur brátt að því að þeim verði lokað. Yfir daginn þarf að loka sólina í burtu. Nokkuð sem er neikvætt við þetta fína veður. Það kom hellidemba í gær klukkan 5, og þurfti ekki að vökva. Við sluppum við eldingar og þrumur, sem grasseruðu viða. Þarf víst aftur að þrífa stóla og glugga :) Píanókennslan í júní hjá okkur. Var búin að þrífa klósettið og búa til kaffi handa kennaranum, hí,hí. Þetta er sko fín þjónusta.
Klaus kom heim um 17.30. Hress með ferðina, og þóttist ekki vera þreyttur. En þau feðgin voru ekki snögg framúr áðan, enda nóttin of stutt. Margrét var að horfa á Germanys next topmodel, sem endar á morgun. Það var ein gella frá BS., sem var ekki beint vinsæl, og vinkonur Margrétar mjög ánægðar að hún fór nýlega. Já, lítið er ungs manns gaman. Þessir þættir eftir amerískri uppskrift eru nú svona og svona. Nokkrir sem ég fæ alveg gubbuna við að sjá.
Þá er það nú betra að horfa á okkar dæmalaust góðu sápu, og skemmta sér við það. Við hlökkum mikið til að koma mömmu aftur inn í það :) :)
Fegin að heyra að Kristínu gekk vel í Sverige, og skil vel að hún sé þreytt eftir allt þetta umstang. Og Malla mín lét heyra frá sér. Fer að styttast í afmæli þar á bæ. Hvað er svo að frétta af ykkur Malla? Ertu ekkert að fá nóg af barnagráti?
Ekki það að þú spjarar þig í öllu, það er alveg klárt.
Þórdís, við bíðum eftir myndum af herbergjunum. Verður Ásta eitthvað með FAF í vinnuskólanum? Það fór í verra með vínarbrauðið, en ég treysti ykkur nú til að redda því þó að Ásta sé ekki legur í bakaríinu. :)
Já, við verðum bara jákvæðar mæðgur áfram, og hlökkum til sumarsins.
Hvenær fer Annett til Hollands með þær litlu? Ef hún færi í júlí, ætli væri sjens að heimsækja þær????? Allavega þekkir hún kannski einhvern gististað, sem við gætum farið til. Ætla endilega að gera eitthvað skemmtilegt með Margréti.
Og Affí að fara suður til að taka íbúðina í nefið. Það verður ekki neitt illa gert ef ég þekki þau skötuhjú rétt. Vona svo að ferðin hjá pabba og mömmu gangi vel. Mamma er örugglega eitthvað kvíðin fyrir fluginu, og hún tekur vonandi nóg af róandi pillum. Þið sjáið um það!
Er ekkert að fara að gerast í því að stækka völlinn á Akureyri? Ég er svo stressuð að þurfa að fljúga innanlands að ég get ekki hlakkað til að koma um jólin. Vildi bara koma að sumarlagi, en svona er það. Það væri því mun skárra að komast í þotu. Diddi --þú sem pólitíkus hlýtur að geta hamrað á þessu við rétta aðila. svona fyrir stóru systur :)
Jæja. Það er allt á tjá og tundri í skrifstofunni, eða vinnuherberginu eins og það kallast hér. Best að fara að koma sér að verki.
Þið hefðuð átt að sjá þau Lukas og Sonju í gær eftir rigninguna. Það kom rosa pollur framan við húsið okkar. Lukas fór ekki fáar ferðir í gegn um hann á tréhjólinu sínu, í bol, nærbuxum og berfættur! Sonja pen og sæt utan við pollinn og horfði á kappann. Hún er svo ekta stelpa í bleiku, hann ekta strákur, með nýju vinnuhanskana sína í 27 stiga hita :)
Og svona eitt enn. Þegar Sonja var með mér á sunnudaginn í garðinum var Margrét að læra. Ég sem sé að vinna á fullu í garðinum. Þá spurði sú stutta. " Af hverju gerir Klaus ekki neitt"
Bragð er að þá barn finnur :)