Slydda í morgun.

Við bíðum eftir hinu versta veðri. Á að koma með hvassan vind, slyddu, þrumur, frost og snjó í dag. Hvað verði úr því er annað mál. En allavega kom hundslappadrífa í morgun þegar þau feðgin fóru af stað á bílnum. Það er alveg kominn tími á að hann kólni og maður hafi það á tilfinningunni að vetur sé genginn í garð. Og jólin fari að nálgast. Á miðvikudaginn verður jólamarkaðurinn í BS opnaður. Og um allt eru markaðir allar helgar fram að jólum. Ekki nema rúm vika í fyrsta aðventusunnudaginn. Það verður því líklega farið að skreyta hér af kappi eftir helgina. Hér í stórbænum Meinersen verða í fyrsta sinn settar skeytingar yfir aðalgötuna. Í þessu 4200 manna þorpi ætti það að vera sjálfsagt, en hér fara menn varlega með peninga. Kannski líka betra svo ekki fari allt eins og heima.

Í gær pakkaði ég í tvo kassa til viðbótar. Nú get ég slappað af og snúið mér að öðrum hlutum. T.d. að jólakortunum, sem eru um 70 ef ég skrifa öllum. Eins gott að byrja að hugsa um það mál.
Það var hundleiðinlegt veður í gær. Ég rétt slapp milli skúra með kassana á pósthúsið, og svo lá peningaveskið heima á eldhúsborðinu! En þar sem konan á pósthúsinu þekkkir mig, er það ekki vandi. Sótti Margréti og skutlaði Kathi heim eftir skóla. Ekki beint góðar strætóferðir hér, og eins gott þegar mömmurnar hafa tíma til að redda krökkunum í dembunni.

Margrét er svolítið þreytt á Kiru, sem hún kennir þýsku. Erfið stelpa. Kemur úr moldríkri fjölskyldu, sem greinlega spillir henni. Þessi famelía fer t.d. til Hamborgar í klippingu! Kiru skilur ekki hvernig Margrét geti þolað að eiga svona lítið herbergi. Þarf maður að segja meira? Mamma Kiru vill gjarnan að Margrét kenni henni tvö fög í viðbót, en þrátt fyrir að Margrét sé að safna í farðasjóðinn, er hún ekki til í það. ( draumurinn er gisting á hóteli í Hollandi næsta sumar eða ferð til Sverige) En Lennart er ljúfur og góður.

Diddi-- það er 19.des. sem um er að ræða. Sem sé dagurinn, sem við komum til landsins. Hún á ekki að fá frí fyrr en eftir hádegið þann dag. En við þurfum að fara af stað um 7 eða 8 um morguninn. Sem sé eitthvað, sem hægt væri að finna upp fyrir seinni partinn þann 19., -sem er jú líka afmælisdagur Arnalds og Susanne mágkonu. ( hvort beygist Arnaldur Arnalds eða Arnaldar--finnst það seinna fallegra ?) Hann fæddist á fimmtugsafmæli hennar.
Þurfa ekki allir erlendu nemendur í Kvennaskólanum að hittast þennan seinni part, eða . Híhí.
Sendu mér bara boðskort á netinu, e-mail á ensku um að hún sé velkomin í ---- eitthvað-----.

Hvernig gengur í Bæjaralandi hjá Aldísi B. og fjölskyldu??? Hef ekki heyrt í þér lengi Aldís mín. Gaman væri að finna komment frá þér. Ertu komin með nýtt verkefni, eða eru það heimilisstörfin, sem fylla hug og tíma :) ! Bestu kveðjur héðan úr norðrinu.

Og Kristín líklega komin norður í laufabrauð? Vildi maður nokkuð vera kominn í það, sniff, sniff! Vona að tvíburarnir setji ekki allt í háalloft hjá ömmu, sem er búin að pússa allt og laga :) Veit að amma yrði svo fúl út af slíku :) Er reyndar með hugann á Akureyri þessa dagana. "Tími nornarinnar" gerist svo sannarlega á Akureyri. Gaman að lesa lýsingar á menntaskólabyggingunum og hinu og þessu í bænum. Sagan er góð, og þrátt fyrir að atburðarásin sé ekki hröð, er þetta bara spennandi. Og ekki spillir að höf. er oftast á sömu skoðun og ég :)

Í kvöld er svo lestrarkvöld og menningarsamkoma í menntaskólanum. Margrét fer og spilar og syngur lagið með stelpunum. Þetta sem þær stöllur sömdu. Ætli maður líti ekki inn og reyni að finna fólk til að spjalla smá við. Góða helgi og hafið það sem best. -- Munið að kíkja á myndir af gulldrengjum Sigurðar Ágúst. Komnar nýjar myndir. Og verið dugleg að kvitta. Líka hjá mér :) Það er ekki smá gellumyndir af Þórdísi og hennar skólasystrum. Ekki kreppulegar að sjá! Var að skrifa kveðju á blogg Þuríðar. Hún er hin hressasta. Og skamma Aldísi Dagmar fyrir að setja ekki myndir á sitt blogg :) Nú tekur við einn skúrinn enn. Best að hita sér kaffi!