Garðvinna

Mánudagskvöld. Og ekki skóli. Himneskt. Aumingja Klaus þurfti í vinnuna.En hann fer að skifta um verkefni, og verða húsbyggjandi, eða þannig, þegar hann fer í frí eftir næstu helgi. Háaloftið bíður hans. Svo honum er líklega rétt sama hvort hann vinni hér eða þar. Ég er aftur orðin góð í bakinu. Í dag var hið indælasta veður. Sól mest allan tímann. Var rokin á fætur klukkan 8, og farin út í garð um leið og ég var búin að lesa blaðið og borða muslíið mitt. Þar beið mikil vinna. Klippti greinar í gríð og erg. Gróf upp tvær rætur með miklum tilþrifum. Staðráðin í því að það sé ég, sem stjórni í vexti gróðursins en ekki hann sjálfur. Mokaði kurluðum berki á lengjuna við akurinn. Og var aðvitað orðin þreytt í gigtarhendinni og fótunum. En bakið blífur!
Neyddi mig til að gera hlé eftir hádegið, og horfði smá á sjónvarpið. Drakk kaffi og var löt. Svo horfðum við Margrét á sápuna hennar ömmu-það er að verða tími til kominn að hún komi aftur til að horfa á þetta með okkur--aðalfjörið að hafa hana. Fórum í gegn um fataskáp Margrétar, og svo tók ég aftur stutta törn úti.
Hjónin frá Póllandi fluttu inn við hliðina á okkur á laugardaginn. Ekki komið eldhús, og skúrinn er troðinn af dóti. Þau hafa líklega þurft að losa hina íbúðina. Eru voða indæl, og vonandi loks fólk, sem ekki dregur fyrir alla glugga um leið og skyggir.
Skrapp út í búð, og lenti á kjaftatörn við eina úr skólanum. Vel á minnst. Ég var svolítið nasty nýlega í Aldi.- Líklega eftir skrifin um framkomu Möllu í Bónus, hí,hí. En samt alveg meinlaust. Það var kona,sem teppti umferðina með vagninum sínum. Eldri kona bað hana að færa vagninn. Ég tók undir og sagði að ég færi þá líka fram hjá. Þá segir sú gamla--Þér hafið líklega verið of mikill heigull til að spyrja. Ég svaraði um hæl---nei, ég var of kurteis!--------
Sko. Þetta var á minn hátt alveg jafnt rosalegt og þegar Malla bað konuna að taka kerruna úr r..... á sér. Svo þið sjáið að ég læri vel af blogginu.
Afskaplega sorglegt með ástandið á bloggi Affíar. Vona að það komist sem fyrst í lag.
Mikið var gaman að finna komment frá Aldísi Björns, og vonandi verður það oftar. Hún er líklega að fara í páskafrí þegar við byrjum í skólanum. Mætum aftur miðvikudaginn eftir páska. En það er nú samt hægt að hittast í Hannover.
Það er kominn tími til að Malla komi til mín og sjái að ég sé alls ekki jafn dugleg að þrífa og látið er af. Það var í den tid. Núna er þetta allt í drasli, þó að "hreint" sé.
Hundleiðinleg spá fyrir næstu daga. Við Margrét förum þá í sorteringar á háaloftinu og bakstur.
Hverjum datt í hug að láta Þórdísi fara eina með Ingó ræflinum norður? Hún gekk greinilega fram af honum, og nú er hann lasinn veslingurinn. Og það einum degi áður en Ásta á afmæli.
Og í lokin --- hjartanlegar hamingjuóskir til Léttfeta, Einars aumingjans, og vonandi hefur hann fengið að drekka wiskíið í herraherberginu sínu á sunnudaginn.