Páskafrí.

Þá erum við komnar í páskafrí við Margrét báðar. Klaus tekur frí eftir viku. Það var sprettur að klára föndur og ég sat við að klippa út bylgjupappír og líma á dósir með límbyssu í lengri tíma. Svo var límdur héri framan á og þetta var voða fint. Krakkarnir fengu svo smá nammi í dósirnar og allir voru ánægðir.
Margrét fékk frí síðasta tímann, og við fengum okkur pizzu í hádeginu. Horfðum á gömlu góðu Mash, og skemmtum okkur vel. Fór svo að ná í nótur fyrir Margréti. Hún er að spila æðislegt lag úr vampírumyndinni. Kom við í bakaríi og við fengum okkur svo te þegar Klaus kom heim. Notaleg byrjun á fríi.

Í morgun hringdi Maria Heim í mig. Hún var búin að reyna oft að ná í mig, og var viss um að eitthvað væri ekki í lagi. Ég sagði henni að ég hefði ekki verið verulega hress undanfarið. Kvef, tannvesen og svo áhyggjur af fólkinu mínu. Hún bað voða vel að heilsa mömmu og pabba og ætlar að biðja fyrir þeim. Ekki verra að fá fólk til slíkra verka.

Fór í gær til Gifhorn að ná í tilvísun á sjúkrahús, sem ég þarf með á mánudaginn þegar ég fer að hitta þessa lækna. Svo er að sjá hvað kemur út úr því. Einhvern veginn ekki alvöru frí með þetta hangandi yfir sér, en það verður víst að gera eitthvað í þessu. Skrapp smá í bæinn, og færði Margréti "bát" frá Subway. Hef ekki komið inn fyrir dyr hjá þeim í marga mánuði. Margrét auðvitað ánægð með hádegismatinn, híhí.

Það var fundur á miðvikudaginn hjá stjórninni í foreldrafélaginu. Enn eitt æðislega húsið. Maður með smá minnimáttarkennd út af kotinu hérna, en það er víst fleira en útlit sem skiftir máli. Hress fundur og alltaf gaman að hitta fólk. Það voru teknar myndir af okkur til að setja á heimasíðuna, og ég skal segja ykkur þegar þær verða komnar. Þá farið þið bara inn á menntaskólasíðuna. Slóð seinna.

Frábært að mamma fari til Lillu, en vonandi er það samt ekki of mikið fyrir Lillu. Skilst að sú gamla sé frekar pirruð á tólunum og hversu mikið það taki í sárið. Þetta er sjálfsagt ekki sérlega spennandi, en gengur yfir.

Svo var ég að skoða fínu myndirnar af sýningu Gumma. Voða fínt og æðislegar myndir af honum og Sigyn. Vonandi að þetta gangi nú vel með fyrirtækið. Við óskum þeim alls hins besta.

Ekki alveg eins ásátt með útlitið á Aldísi Dagmar með skallann. Hún, sem er reglulega hugguleg að gera sig svona ljóta. Hár er svo mikil prýði, en það finnst víst sumum ekki. En unga fólkið verður víst að fá að reka sig á og gera það, sem það vill. Og einhvern tímann vex þetta aftur :)
Góða helgi og hafið það gott.