Sól á sunnudagsmorgni.

Tíminn flýgur áfram. Á föstudaginn var 21. giftingardagurinn okkar Klaus. Margrét bakaði ostaköku, eða skyrköku. Við lögðum fínt á kaffiborðið, og ég klippti blóm og setti í skál. Þegar Klaus kom heim varð hann heldur betur hissa. Hvað væru um að vera. Já, hann gleymdi þessum degi eins og í flest öll skiftin. Það er stundum sorglegt að eiga eiginmann, sem aldrei gerir nokkuð huggulegt fyrir mann, en maður verður víst að hugsa um góðu eiginleikana, og vera hress fyrir því. Við Margrét fórum bara í staðinn í bæinn í gær, til BS, og nutum þess að vera í bíói og lifa okkur inn í hina yndislegu veröld, sem Mamma Mia birtir okkur. Myndin er yndisleg. Landslagið er bara draumur. Ætli þessar eyjar séu til í alvöru, eða búnar til á tölvu.? Allavega er þetta næstum of fallegt til að vera satt. Það er æðislegt að fá texta svíanna í tengingu við atburði á tjaldinu. Maður skilur núna miklu betur texta, sem maður hefur sungið og hlustað á í gegnum öll þessi ár. Þetta var sem sagt yndisleg stund og við mæðgur komum fullar af lífsgleði út úr salnum. Við vorum búnar að mæla okkur mót við Danielu, Susanne og Gregor á eftir. Hittum þau klukkan 8 framan við höllina, og sátum þar á kaffihúsi fram til hálf tíú. Allir óvenju hressir, og þetta var bara mjög gaman. Heima beið svo Klaus framan við sjónvarpið að vanda.
Ég missti af símtali frá Þórdísi og Didda, en þau gera vonandi aðra tilraun bráðum.
Við komum fyrir kaffi í bæinn, og kíktum í búðir. Flottur kjóll í Vero Moda og fleira slíkt. Alltaf hægt að láta sig dreyma.
Fengum okkur pizzu " í hendina" hjá Pizza Hut, og nörtuðum í á leiðinni. Og svo féllum við fyrir spennandi bókum, og hlökkum til að lesa þær.
Er að passa köttinn þessa helgi. Fór í morgun á hjólinu, og vona að ég haldi svo áfram að vera dugleg að hreyfa mig þó að hann fari að kólna.
Margrét fór með Doreen til Wolfsburg í bíó á fim. Þær sáu Superhero Movie. Með honum Drake Bell, Pamela Anderson og fleiri góðum. Á meðan fór ég í sólbað. Í annað skifti á þessu sumri! Hef ekki haft tíma fyrir garðvinnu, gestum og tiltekt. Fékk m.a.s. lit á mig.
Í dag er besta veður. Við Margrét ætlum að taka bílinn í gegn á eftir. Svo bíður grillkjöt í ísskápnum. Þáttur um garða í sjónvarpinu, og dagurinn verður örugglega ekki lengi að líða.
Erum að spá í að taka lestina til Hamborgar á morgun. Þvælast þar í bænum. Svo þarf ég að fara með Klaus til BS á þriðjudagsmorguninn. Hann fer á þeim bláa og setur hann á verkstæði. Ég ek honum svo í vinnuna, og heim. Upp í skóla til að hjálpa kennurum Margrétar að sortera nýju námsbækurnar. Og svo þarf ég að sækja Klaus um kvöldið. Síðan er tannlæknatími á miðvikudaginn, og skóli og vinna á fimmtudaginn. Sniff, sniff.
Vona svo að hún Arnhildur mín fari að ná sér í dag eftir hálsbólgu og slappleika. Við söknum þess að finna engin góð komment frá henni. Saknaðarkveðjur frá okkur ástin mín.
Njótið sunnudagsins, og hafið það öll sem best.