Aðventan.

Þá er fyrsti sunnudagur í aðventu að fara að renna sitt skeið. Hér er ekki beint jólalegt. Of hlýtt og í dag er hvasst, og af og til smá rigning. Við ströndina spáð fárviðri. Já, og gott að búa hérna þegar svona veður ganga yfir. Margrét kvartar í Norge að enginn snjór sé kominn enn. Það voru ein 10 stig. Ekki eins og í fyrra þegar snjórinn kom í lok okt. og hvarf ekki fyrr en undir vorið.
Ég hef verið að setja upp jólaljósin. Þrífa og pússa glugga áður en ég set upp stjörnurnar og bogana. Strauja gluggatjöldin og þvo stofugluggatjöldin. Ná í dót á háaloftið og svona fram eftir götunum.
Var svo að bera út blaðið fyrir söfnuðinn. Og hugsa um köttinn.

Á fimmtudaginn fór ég á söngæfingu í Gospelkórnum. Það er sami stjórnandi, Renate, og í kirkjukórnum, sem ég var í. Í þesssum kór er mun yngri konur og ég kannast við nokkrar. Er að reyna að syngja alt, því röddin í mér er svo ryðguð. Ég hugsa helst að þessir hnútar á skjalkirtlinum hafi einhver áhrif á raddböndin. En kannski er það bara bull. Ekki gekk mér of vel að læra röddina þar sem til vinstri var ein ekki örugg, og til hægri ein, sem saöng af og til sópran :) Svo ég sagði kórstjóranum að hún skyldi sko fá að koma heim til mín úr því hún vildi endilega fá mig í kórinn og kenna mér þetta hérna :) En nú kemst ég ekki næsta skiftið því það er 1.des., og við förum til Ramonu, sem á afmæli. 28 ára. Sennilega koma Daniela og foreldrarnir hingað og við svo saman á einum bíl.

Á fö. vaknaði ég með þvílíka verki í maganum, vinstri síðu til að vera nákvæm eins og ég er nú :) Komst varla niður stigann og hringdi í Frau Kühle. Hún kom og heimtaði að fara með mig til læknis. Þó að verkirnir væru horfnir. Læknirinn taldi þetta í ristlinum og lét mig fá belgi til að taka ef ég fengi svona aftur. Við keyptum okkur svo rúndstykki og fengum okkur morgunmat með kaffi frá Starbucks, sem ég splæsti á mig. Það kostar nú bara 4.50 evrur og betri kaffisortir eru á 4 evrur á tilboði. Ekki það að nóg er að borga fleiri hundruð krónur fyrir hálf kíló af kaffi.

Klaus fór til tannlæknis, sem ekki hefur gerst í 20 ár. Hann fer svo oftar á næstunni til að láta skifta um fyllingar. Ég fór líka nýlega og bíð eftir reikningnum. Þó maður sé að borga slatta á mánuði þá þarf að borga fyrir ansi margt aukalega. En við ráðum við þetta og engin ástæða til að kvarta.

Margrét fór á fyrsta jólamarkaðinn í gær með fjölskyldunni og tveimur vinkonum Dani. Gaman auðvitað og nú bíður hún eftir því að Norsararnir fari loks að skreyta! Ekki komin ljós upp að ráði. Kannski Þjóðverjar séu bara meira jólafólk en Norsararnir, hehe.
Sendi henni svo pakka um helgina með jólanammi svo hún fái pakka ein sog hinir. Bíð enn eftir pöntun frá H&M. Er fúl út í þá, því ég ætla að senda KD sumt af þessu og farið að liggja á.

Margrét var sko ekki sátt við það að ég skyldi setja græna ljósakransinn, sem ég fékk einu sinni frá Affí og fjölskyldu í litla gluggann í stofunni. Hann var alltaf í stóra glugganum, til hægri. En nú setti ég jólasveinagluggatjöldin á nýju gardínustöngina og hún er svo hátt uppi að það er mikið pláss milli efri og neðri gardínunnar. Og kransinn sómir sér vel. Já, það þýðir sko ekkert að fara bara að heiman og ætla svo að kvarta, ó nei, nei.

Í dag er ég eitthvað svo syfjuð. Kannski bara rokið, sem fer í mann. Er núna að fara í gegn um blaðalistann minn og henda pöntunarlistum, sem ég fæ í tonnatali.
Best að halda áfram við það. Bið ykkur öll vel að lifa.
Gleðilega aðventu.