Haust og veður eftir því.

Hann rignir og rignir. Svo kemur einn dagur með sól og vind. Svo rignir og rignir. Þetta fer að verða alveg nóg í bili. Laufin farin að fölna og gulna. Þetta hefur verið skrítinn endir á sumri. Hvernig skyldi svo veturinn verða.
Við erum samt hress og bara allt gott að frétta. Nóg að gera í alls konar stússi. Fór með bókapöntunarlistana í menntaskólann. Líka í útibúið í Leiferde. Svo til Müden að ná í lyfseðla hjá nýja lækninum okkar. Er að hugsa um köttinn og verð áfram að sjá um Sonju næstu tvær vikurnar. Svo var fundur með skólastjórninni og eftir það er Ines, sem vinnur með mér á fullu að prenta út leiki, finna föndurhugmyndir og hvað eina. Diana, hin gellan, er lasin og búin að vera frá vinnu í tvær vikur. Það er hræðilegt því þá þurfum við oftast út ef veður leyfir með 3 hópa og getum ekki gert neitt af viti. Svo það er erfitt að gera vinnuáætlun ef við getum ekki unnið samkvæmt henni heldur verðum að vera með eftirlit í stað föndurs.

Margrét búin að vera í 3 prófum í þessari viku. Hún er hálf kvefuð og kom einn daginn heim úr skólanum. Komst samt til BS á mjög góðan fyrirlestur hjá manni, sem bauð sig fram sem forseti núna í vor. Hann komst því miður ekki að. Þessi maður heitir Gauck, og sá um að koma upp safninu með öllum njósnaskýrslunum í austur Þýskalandi. Þessu, sem fólk hefur farið í til að fá upplýsingar um hver njósnaði um það. Það var ótrúlegt hversu margir njósnuðu um sína bestu vini, jafnvel fjölskyldu.

Klaus feginn að vera heima. Ótrúlegur hiti í Japan, og erfitt að vera á ferðinni í svona langan tíma. Hann á nú eftir að gera skattaskýrsluna sína eins og vanalega-- og búinn að fá kvörtunarbréf frá skattinum. Hann er bara ótrúlegur, svo latur. Karlmenn!

Við Margrét erum báðar komnar til heimilislæknisins Frau Kremeike. Ég var að drepast í maganum eina nóttina og svaf varla neitt. Hún vill að ég fari til BS í ristilspeglun. Og fari á staðinn þar sem hún vann sem læknanemi. Ég fæ tíma í viðtal í fyrri vikunni í haustfríinu, (byrjar 9.10 ) og fer svo í skoðunina í seinni vikunni, eða 20.10. Gaman að eyða fríinu í þetta en hvað á maður að gera þegar enginn er til að vinna fyrir mann í skólanum, og allt í hers höndum þar út af veikindum. Það voru 6 veikir á fimmtudaginn, -fyrir utan einn langtíma lasinn, og 4, sem vinna í afleysingum. Flott, eða þannig.
En við Margrét gerum örugglega líka eitthvað skemmtilegt.

Það er yndislegt að komin sé helgi. Í dag áttum við eftir möffins, sem ég bakaði í fyrradag. Notalegt að sitja smá framan við imbann og drekka te með möffins. Svo er ég að fara í gegn um föndurblöð og taka eitthvað til í vinnuherberginu.
Reyndar verður sunnudagurinn ekki afslöppun. Fer snemma um morguninn með vöffludeig og verð að selja allan daginn í Leiferde með foreldrafélaginu.
Hafið það sem best--- góða helgi.