Eins gott að standa sig í blogginu!

Nú er dóttir mín sú yngri búin að kvarta svo mikið út af því að enginn kvitti (nema Kristín) að fólk tók kipp:) Takk þið öll. Og ekki má ég láta deigan síga og best að pikka nú smá.
Yndislegt veður í dag. Sól og logn. Ekki rigningardropi, sem er hreinlega ótrúlegt.
Allir í stuði og hressir í svona veðri.
Margrét dugleg í dag að vanda. Langur dagur og leikfimi í síðustu tveimur tímunum. Hún er í dansi og fær þá gagnrýni að hún sé ekki með "Körperspannung"-spennu í líkamanum. Hmhm--líkst hún móður sinni, híhí. Ekki komin út af Helga, og ekki er Klaus slakur :):):) En hún hleypur nú samt ekki með höndunum!
Auðvitað ók ég henni í skólann og sótti, og bakaði vöfflur handa henni, dekurdótturinni. Henni finnst hún eiga það skilið, hehehehe.

Sonja og ég löbbuðum í skólann í morgun. Nú er bara eftir ein vika fyrir utan þessa og þá kemur pabbinn frá Kína. Held ég muni sakna hennar á morgnana þó að gott sé líka að geta gert eitthvað annað snemma á morgnana. Þurfti t.d. til Gifhorn í gær og komst bara naumlega í vinnuna þar sem ég fór ekki af stað fyrr en hún var komin í skólann. En aðal ástæðan var nú að þetta dróst nú heldur betur.
Ég fór nefnilega á skrifstofuna hjá útlendingaeftirlitinu. Fékk nýjan passa í sumar. Ég er með ótakmarkað dvalarleyfi. Það er settur miði í passann og nú þurfti ég nýjan miða í nýja passann. Beið í 50 mín. Og þá sagði gæinn-ertu með passamynd? Ég -ha, til hvers? Það er mynd í passanum.- Þá eru komnar nýjar reglur, held frá 2006, um að mynd verði að vera skönnuð á þennan límmiða. Svo ég mátti arka í bæinn, finna ljósmyndara, borga 15 evrur og arka svo aftur upp í höllina í Gifhorn. Losnaði sem betur fer við langa bið. Og nú er ég alveg lögleg!

Þurfti líka að ná í resept til kvennsjúkdómalæknisins, og verlsa smá. Í dag var líka snatt hingað og þangað. Pósthús, búðir, smá heimsókn til hjóna, sem eru í vinskap við pabba og mömmu. Alltaf gaman að koma til Krimmeike, og margt að spjalla við þau.

Við þrjár í gæslunni--loks engin lasin, löbbuðum svo með hópana þrjá að 3 stórum eikartrjám. Þar fundu börnin hnetur og sáu frosk, sem var víst ótrúlega stór. Við erum að sanka að okkur efni til að setja á borð, sem skreyta á með hausthlutum og myndum. Nóg að gera. Fékk epli hjá vinkonu minni, sem ég skar í sundur og þau stimpluðu í gær á pappír. Þetta voru epli, sem duttu af trjánum og eru ekki til að borða. (svona til að þið haldið ekki að ég skemmi mat!) Svo notum við laufblöð til að gera vatnslitamyndir. Og hitt og þetta er á döfinni. Verð að taka mynd þegar við erum búnar að koma þessu upp.
Ég legg nú mesta áherslu á að börnin geri sem mest sjálf og þetta verði ekki fullorðinna-skreyting.

Það var stuð um helgina. Var að vinna fyrir foreldrafélagið frá 9 á sunnudagsmorguninn. Var búin að búa til 4 uppskriftir af vöffludeigi með aðstoð Margrétar. Við settum upp tjaldið okkar, og seldum þar vöfflur og franskar. Kom heim um hálf sjö um kvöldið. Var gamana og hitti nokkra, sem ég þekki. M.a. skólastjórann, sem gat sagt mér að eftir að Margrét er búin með síðasta prófið, sem er milli 3. og 19. maí, er hún laus úr skólanum! Því var nefnilega haldið fram að þau þyrftu samt að mæta, sem væri algjört bull. Hún mun því taka stefnuna heim upp úr þessu ! Svo fá þau einkunnirnar í lok júní. Ergilegt því þá þarf hún að koma aftur út. En nú er búið að hnoða saman þessu með afmæli og fermingar.-Veit ekki um útskriftir (?)

Örn fermdur fyrir páska, -við komumst ekki, sniff. Guðný fermd 5.6., við þá komnar, og Kristín Dögg fermd 11.6., sem er á hvítasunnunni. Og svo verður mamma 75 daginn eftir, þann 12.6. Ég veit ekki hversu mikið frí ég get tekið. Þetta er svo mikið vesen út af tryggingum, sem kemur í veg fyrir að einhver vinni fyrir mig þó að ég hafi fólk í það. Sjáum nú til.
En klárt er að ég þarf örugglega aðstoð ykkar við bakstur og undirbúning og treysti á ykkur öll svo Maddý elsku besta frænka lendi ekki í því að gera alltaf mest. Það er líka ekki langt á milli þessara ferminga hjá frænkunum og sama liðið stendur í þessu öllu. En kannski þær systur, Margrét og Arnhildur hristi þetta nú bara einar fram úr ermunum :)

Jæja, klukkan orðin tíu að kvöldi og stefnan tekin á koddann. Ég er farin að hátta um 9.30 flest kvöld og er þá ekki neitt syfjuð á morgnana. En asnalegur tími er þetta nú samt.
Vona að það verði áfram gott hljóð í ykkur og hafið það öll sem best.
Vona að það verði "Góður dagur" hjá ykkur öllum á morgun.