Loks hætt að rigna.

Þriðjudagsmorgunn og sólin skín glatt. Eftir allar demburnar undanfarna vikuna og þá sérstaklega síðustu fjóra daga, erum við alsæl að sjá sólina. Það var varla hundi út sigandi. Sagt í fréttum að ekki hafi áður verið mæld svona mikil úrkoma í ágúst. Þetta var alveg nóg og meira en það.
Við höfum það ágætt. Klaus fór í gær til Marburg og gisti það í nótt. Ók honum á lestarstöðina í gær um kaffileytið og hann lenti í einni ofsa dembunni. Kemur svo heim um kvöldmat í kvöld.
Ók reyndar Margréti í morgun í skólann þrátt fyrir blíðuna. Hún er í dag með maraþondaginn sinn. 7.30 til 16.15, og svo kemur Lennart í latínu til hennar. Ég reyni að dekra smá viða hana á svona dögum, en veit að þið trúið því nú ekki. Mér leiðist frekar að dekra við fólk:)

Er loks aftur komin í gang með æfingarnar mínar og finn hvað ég er aftur máttlaus í magavöðvunum. Klaus gat loks komið lofti í nýja/gamla hjólið mitt, sem ég keypti af Hildegard. Það er með dempara, sem er gott fyrir fólk með lélegan kjallara :) Hún seldi mér það á 150 evrur. Gat ekki notað það út af því að grindin er svo há að hún á erfitt með að lyfta löppunum yfir, hjá pedúlunum sem sagt. En hún lét setja nýtt stýri, sem er ekki gott. Held ég setji aftur það upprunalega. Við Margrét náðum í hjólið meðan Klaus var í Berlin og stönsuðum um stund hjá þeim stöllum. Alltaf gaman að koma til þeirra.

Margrét er búin að skifta um lækni. Hún er hjá konu í næsta þorpi, Frau Kremeike. Við erum búnar að fá nóg af Weiland, sem var alltaf svo kærulaus og útskýrði ekki neitt fyrir manni. Margrét fór í blóðtöku (segir maður það?) og allt í lagi. Eins skoðaði hún skjaldkirtilinn og engir hnútar eru hjá henni. En engin undankoma með að taka þessar pillur á morgnana og það er bara hlutur af okkar daglegu tilveru það sem eftir er ævinnar. Þessi læknir er bara æðisleg og við mjög ánægðar. Ég á svo eftir að skifta líka.

Veðrið hefur ekki gert mann hressan. En eitthvað dundar maður sér þó við skemmtilegu tiltektina, híhí. Tók geymsluna í gegn og það var að vanda mikið verk. Klaus sló grasið á laugardaginn áður en fyrsti skúrinn kom. Ég gat hreinsað mosa og illgresi á milli steinanna í stéttinni framan við húsið og tekið slatta af beðunum í gegn. Milli skúra:)
Svo tókum við tvisvar mynd á leygu og nutum þess að vera öll í rólegheitum framan við sjónvarpið á fö. og laugardaginn. Margrét bakaði banana möffins á sunnudaginn. Ég svo marmaraköku í gær og súkkulaðiskonsur. Margrét fegin að fá eitthvað gott með kornabrauðinu í nesti í morgun.

Margrét þarf að lesa námsefni þessa veturs og síðasta veturs fyrir stúdentsprófið. Fyrsta prófið er í lok mars. Kennsla þar til tveimur dögum áður eða um það bil. Svo það er ekkert sem kallast upplestrarfrí. Ó nei. Enginn lúxus hér. Hún þarf þess vegna að lesa smám saman þetta efni til að halda sér við. Dreif í því í gær að byrja á enskunni og ætlar að taka allavega klukkutíma hvern mánudag í upprifjun. Annars fer þetta bara í stress. Hún verður svo í helling af prófum núna í september og í nóvember. Þá straks í 4 klukkustunda prófum til að venja sig við stúdentsprófin. Þetta er reyndar klikkun en svona er það bara hérna.

Jæja. Ég hætti þá í bili þó að fáir lesi þetta enda halda menn líklega að ég sé alveg hætt eftir svona langt hlé :) Vona að þið hafið það sem best. Kærar kveðjur frá Meinersen.